Anggen titiyang titi pemargin Palungguh Betara, melarapan antuk Sanggar puniki anggen kelir wayang idealisme sujati paketel bawan palungguh Betara.
Inggih punika mapusungan saking Prerai Maha Meru Tohlangkir, mesunar galang muncrat pakecritcrit keajeng. Pucuk Ida Betara megelar daun ring Pura Penataran Gunung Anyar, mecarang kekalih ngiwa lan tengen. Pemargi ngiwa muncrat riin ring Pura Jati make Gangga ring Telebuh raris memargi malih ngidul, ngetel banyune ring Mumbul Komala... duhhh ening pisan prabawane...tenget tan kabinawa, mepepatih lintah a lampit lan Ulam Julit sane sampun mebusana mahkota. Malih Ida memargi ngelintangin Subak Batu Ganggung, nyeledet pingit ring semetone Kelebutan Sempol raris mesandekan ring Subak Kejanti sedurung jenek ring Pura Batur Ujung Seri, irika sarin Idane ahas tur malih mentik ngalerang nuju Yang Ibu. Ida Meperagayan Aksara Ung.
Pemargi nengen kewawanin saking Pura Telaga Liligundi sakewanten nenten kanten prabawa Idane, Ida memargi doh ring jeroning gumi, makecrit akidik ring Geredeg raris memargi lintang Subak Bingin ring Banjar Book ngelintang ring Subak Purtaka raris jumenek ring Kayoan Atma taler nenten kanten prabawan Idane. Iriki Ida meyoga kaabih olih para roh sane durung ngemolihang genah ring soang - soang jeroan. Ida meperagayan aksara Ang.
Pemargi ring tengah Ida meperagayan aksara Mang, prabawan Idane meraga suung/cetana acetana, memargi memuterin akasa sawewengkon pemargi Kiwa lan Tengen, mesandekan bawa cakran Idane ring puncak Pakis Kandel, Irika Ida mebusana jangkep santukan irika taler Ida medue Puri, make Ratuning sarwa Gandarwa, Widiadara Widiadari, Roh Suci Manusia muang Buron, Ida iriki merupa Ratuning Alas; Singa Nata Raja Ida.... Pakenyornyor sunar penyingakane. Merambut Jinah blong meakit antuk sutra. Mejoli Jempana Emas lan mesoce mirah bang, mecudemani mirah delima...... angob titiyang ngantenang Prabawan Idane. Mepepatih roh suci Rakyan Kepakisan sane taler dados Pekandel ring Pura Taman Ayun, Maduwe Kubayan Kepasekan sane alar ilir ring Bukit Bada Budu ( Buda Budi ) sewewengkon Ngis lan Tenganan. Asapunika kawentenan Idane dasdos Ratu ring Puncaking Pakis Kandel.
Taler Ida mesunaran ring Desa Tohpati, Aksara Ung/Tengen,Ida melingga ring Meru Tumpang Limane. Aksara Ang/Kiwa, Ida melingga meraga Ida Ratu Gede. Sunaran Idane rauh ring Banjar Pande Sari/Banjar Book setuggil aci Coma Ribek ring Pura Pemaksan.
Asapunika Peyogaan Ida, yan rerehang ring indik sastra aksarane Ida Penunggalan Swalelita lan Modre, yoga cakra mangilingan anggan Idane.
Dumogi Sanggar Titiyang puniki meresidayang dados titi mahmah rikala Ida pacang tedun kejagate.....pemekas ring sawewengkon Jagat Tohpati.
'Om, Ksama swamam Mahadewa, 'Sarwa prani hitang kara, 'mamoca sarwa papebyah, 'Pala ya ciwa sadha Ciwa Ya.
'Om, Ksantawya kayika dosah, 'Ksantawya wacika mama, 'Ksantawya manasa dosah, 'Tat Pramadat ksama swamam.
'Om'Shanti Shanti Shanti'Om
No comments:
Post a Comment